Արցախի Հանրապետության Մարդու իրավունքների պաշտպանը հայտարարում է փորձագետների ներգրավման մրցույթ ԱՀ-ում երեխաների իրավունքների պաշտպանության ոլորտի վերաբերյալ ուսումնասիրություն իրականացնելու նպատակով: Ուսումնասիրությունը կատարվելու է Մարդու իրավունքների պաշտպանի և «Վորլդ Վիժն Հայաստան» Երեխաների պաշտպանության հիմնադրամի միջև 2020թ մարտի 5-ին կնքված համաձայնագրի շրջանակներում՝ միջազգայնորեն ընդունված մեթոդաբանությամբ գնահատելու համար երեխաների շուրջ 10 իրավունքների պաշտպանության վիճակն Արցախում և նախանշելու ոլորտի հիմնային բարեփոխման ուղղությունները:
Մրցույթի շրջանակներում Պաշտպանի աշխատակազմն ընդունում է հայտեր չորս փորձագետի (ծրագրի համակարգող, միջազգային իրավունքի մասնագետ, սոցիալական ոլորտի իրավաբան, սոցիոլոգ) ներգրավման համար: Փորձագետների գործառույթներն ու պահանջվող որակավորումները ներկայացվում են ստորև:
Ուսումնասիրության համառոտ հիմնավորումը
Արցախի Հանրապետությունում երբևէ համապարփակ ու խորքային կերպով չի գնահատվել երեխաների իրավունքների պաշտպանության համակարգի արդյունավետությունը, ինչի հետևանքով հնարավոր չէ արձանագրել առկա բացերը և իրականացնել համապատասխան ու արդյունավետ բարեփոխումներ: Դա իր հերթին հանգեցնում է երեխաների տարբեր իրավունքների համակարգային ու շարունակական խախտումների: Հանրապետությունում առկա են երեխաների հանդեպ վատ ու խտրական վերաբերմունքի, բռնության կիրառման, իրավունքների անհամաչափ սահմանափակման և երեխայի մարդկային արժանապատվության հետ անհամատեղելի դեպքեր, որոնք վնասում են թե՛ երեխաների լիարժեք ու ներդաշնակ զարգացմանը, թե՛ կրթության և այլ իրավունքների ամբողջական և արդյունավետ իրացմանը:
Հաշվի առնելով այն կարևոր հանգամանքը, որ պետությունը պարտավոր է ապահովել բարենպաստ միջավայր երեխաների իրավունքների համակողմանի պաշտպանության համար՝ անհրաժեշտություն է առաջացել իրականացնել համապարփակ ուսումնասիրություն-վերլուծություն, որը թույլ կտա ախտորոշել երեխաների իրավունքների պաշտպանությանն առնչվող հիմնախնդիրներն օրենսդրական ու իրավակիրառական մակարդակներում և մշակել դրանց լուծման մեխանիզմները:
Տևողությունը և վճարման պայմանները
- Ծառայություններ մատուցող փորձագետի հետ կկնքվի ծառայությունների մատուցման պայմանագիր վեցամսյա ժամանակահատվածի համար.
- Իրականացվելիք աշխատանքների ժամանակացույցը կկազմվի պատվիրատուների հետ միասին՝ ելնելով տվյալ պահին առկա անհրաժեշտությունից.
- Պատվիրատուները վճարումը կկատարեն փաստացի կատարված աշխատանքներն ավարտելուց հետո՝ վերջնական հաշվետվությունը ներկայացնելուց և երկուստեք ստորագրված ընդունման-հանձնման ակտի հիման վրա՝ 5 աշխատանքային օրվա ընթացքում:
Դիմումների ընդունման կարգը
Սույն մրցույթին մասնակցելու համար դիմողները պետք է ներկայացնեն հետևյալ փաստաթղթերը՝
- Ինքնակենսագրական (CV), ներառյալ՝ կոնտակտային տվյալները.
- Մասնագիտական կրթությունը հաստատող փաստաթղթի պատճենը.
- Ստորև ներկայացվող գործառույթներից բխող աշխատանքների իրականացման համար անհրաժեշտ գործողությունների պլան-ժամանակացույց.
- նմանատիպ աշխատանքների իրականացման վերաբերյալ նախկին փորձը:
Նշված փաստաթղթերը պետք է ներկայացվեն մինչև ապրիլի 29-ի ժամը 18:00-ն՝ ուղարկելով info@ombudsnkr.am և wvarmprocurement@wvi.org էլեկտրոնային փոստի հասցեներին՝ վերնագրում նշելով «Փորձագետների մրցույթ»: Մրցույթին կարող է մասնակցել ներքոնշյալ պայմաններին համապատասխանող յուրաքանչյուր ոք՝ անկախ բնակության ու հաշվառման վայրից:
Մրցույթի պահանջներին ու պայմաններին համապատասխանող դիմորդները երկրորդ փուլում հրավիրվելու են հարցազրույցի, որի արդյունքների հիման վրա ընտրվելու են հաղթողները, որոնց հետ էլ կկնքվեն ծառայությունների մատուցման պայմանագրեր:
Ստորև ներկայացվում են չորս փորձագետների գործառույթները և պահանջվող որակավորումները:
I. Ծրագրի համակարգող
Սույն ծրագրի շրջանակներում ծառայություններ մատուցող ծրագրի համակարգողը կատարելու է հետևյալ աշխատանքները՝
- Համակարգել Արցախի Հանրապետության Մարդու իրավունքների պաշտպանի և «Վորլդ Վիժն Հայաստան» Երեխաների պաշտպանության հիմնադրամի միջև կնքված «Արցախի հանրապետությունում երեխաների իրավունքների պաշտպանության վերաբերյալ ուսումնասիրության մասին» համաձայնագրի շրջանակներում իրականացվելիք ծրագիրը.
- Կազմել ծրագրի իրականացման համար ներգրավված փորձագետների աշխատանքային գրաֆիկները՝ ըստ համաձայնագրով նախատեսված ժամանակացույցի և հետևել դրանց իրականացմանը.
- Կազմակերպել ծրագրում ներգրավված փորձագետների աշխատանքային հանդիպումներն ու քննարկումները ( ըստ անհրաժեշտության).
- Կապ հաստատել Արցախի Հանրապետության պետական կառավարման և տեղական ինքնակառավարման մարմինների, հասարակական կազմակերպությունների ներկայացուցիչների հետ՝ ծրագիրը ներկայացնելու և վերջիններիս աջակցությունը ապահովելու նպատակով.
- Գործուն աջակցություն ցուցաբերել ծրագրում ներգրավված փորձագետներին՝ արդյունավետորեն անցկացնելու հանդիպումներ, ֆոկուս-խմբային քննարկումներ (ներառյալ երեխաների հետ), խորին հարցազրույցներ ոլորտի պաշտոնյաների, մասնագետների և փորձագետների հետ, դիտարկումներ և այլն.
- Իրականացնել ուսումնասիրությունների համար անհրաժեշտ կազմակերպչական աշխատանքներ (պայմանավորվածություններ հանդիպումների համար, լոգիստիկա և այլն).
- Պատասխանատվություն կրել ծրագրի բյուջեի նպատակային և արդյունավետ օգտագործման համար.
- Ներկայացնել ծրագրային և ֆինանսական ամսական հաշվետվություններ, իսկ ծրագրի ավարտին՝ վերջնական և ամբողջական հաշվետվություն.
Ծրագրի համակարգողը պետք է ունենա՝
Ա) Սոցիալական, կառավարման կամ հարակից որևէ մասնագիտությամբ բարձրագույն կրթություն.
Բ) Ծրագրի ղեկավարի կամ համակարգողի աշխատանքի առնվազն 5 տարվա փորձ.
Գ) Կառավարման և անձնակազմի հետ աշխատանքի հմտություններ:
II. Միջազգային իրավունքի մասնագետ
Սույն ծրագրի շրջանակներում ծառայություններ մատուցող միջազգային իրավունքի մասնագետը կատարելու է հետևյալ աշխատանքները՝
- Ուսումնասիրել Երեխայի իրավունքների մասին ՄԱԿ-ի կոնվենցիայի կատարողականի գնահատումը իրականացնելու համար նախատեսված ուղեցույցը.
- Ուսումնասիրել Երեխայի պաշտպանության ինդեքսի մեթոդաբանությունը.
- Մշակել առաջարկությունների փաթեթ նշված ուղեցույցը և մեթոդաբանությունը տեղի առանձնահատկություններին հարմարեցնելու ուղղությամբ՝ կիրառելով դրանք Երեխայի իրավունքների մասին ՄԱԿ-ի կոնվենցիայի կոնկրետ հոդվածներով նախատեսված իրավունքների իրացման մակարդակը ստուգելու համար: Ուսումնասիրության համար ընտրված իրավունքներն են՝
- Հոդված 19. Բռնություններից պաշտպանված լինելու իրավունք,
- Հոդված 20. Ընտանիքում ապրելու իրավունք,
- Հոդված 23. Հաշմանդամություն ունեցող երեխաների իրավունքներ,
- Հոդված 24. Առողջության և առողջապահական ծառայություններից օգտվելու իրավունք,
- Հոդված 26. Սոցիալական պաշտպանության իրավունք,
- Հոդված 28. Կրթության իրավունք,
- Հոդված 31. Հանգստի և ժամանցի իրավունք ,
- Հոդված 32. Աշխատելու իրավունք և ապօրինի աշխատանք,
- Հոդված 38. Զինված հակամարտությունների մեջ ներգրաված երեխաներ,
- Հոդված 39. Վերականգնողական ծառայություններ:
- Մշակել առաջարկությունների և անհրաժեշտ գործընթացի փաթեթ՝ Արցախի Հանրապետության կողմից ընդունելու Երեխայի իրավունքների մասին 1989թ. ՄԱԿ-ի կոնվենցիան.
- Ծրագրային թիմի ներկայացուցիչների հետ մասնակցել (անհրաժեշտության դեպքում) աշխատանքային քննարկումներին.
- Ներկայացնել կատարված աշխատանքների մանրամասն հաշվետվություն:
Միջազգային իրավունքի մասնագետը պետք է ունենա՝
Ա) Իրավաբանի մասնագիտությամբ բարձրագույն կրթություն.
Բ) Իրավաբանի մասնագիտությամբ աշխատանքի առնվազն 5 տարվա փորձ.
Գ) Ուսումնասիրություններ և վերլուծություններ իրականացնելու փորձ և հմտություններ:
III. Սոցիալական ոլորտի իրավաբան
Սույն ծրագրի շրջանակներում ծառայություններ մատուցող սոցիալական ոլորտի իրավաբանը կատարելու է հետևյալ աշխատանքները՝
- Ուսումնասիրել Արցախի Հանրապետության՝ երեխաների իրավունքների պաշտպանության ոլորտը կարգավորող օրենսդրական դաշտը.
- Ուսումնասիրել Արցախի Հանրապետության պետական կառավարման և տեղական ինքնակառավարման մարմինների՝ երեխաների իրավունքների պաշտպանության ոլորտին վերաբերող պարտականությունների և պատասխանատվության շրջանակները (կանոնադրություններ, կարգեր և այլն).
- Ուսումնասիրել Արցախի Հանրապետության երեխաների իրավունքների պաշտպանության ոլորտում գործող հասարակական կազմակերպությունների պարտականությունների և պատասխանատվության շրջանակները.
- Վերը նշված ուսումնասիրությունների հիման վրա մշակել Արցախի Հանրապետության՝ երեխաների իրավունքների պաշտպանության ոլորտը կարգավորող օրենսդրական դաշտի բարեփոխումներ ապահովող առաջարկությունների փաթեթ.
- Ծրագրային թիմի ներկայացուցիչների հետ մասնակցել (անհրաժեշտության դեպքում) աշխատանքային քննարկումներին.
- Ներկայացնել կատարված աշխատանքների մանրամասն հաշվետվություն:
Սոցիալական ոլորտի իրավաբանը պետք է ունենա՝
Ա) Իրավաբանի մասնագիտությամբ բարձրագույն կրթություն.
Բ) Իրավաբանի մասնագիտությամբ աշխատանքի առնվազն 5 տարվա փորձ.
Գ) Ուսումնասիրություններ և վերլուծություններ իրականացնելու փորձ և հմտություններ:
IV. Սոցիոլոգ
Սույն ծրագրի շրջանակներում ծառայություններ մատուցող սոցիոլոգը կատարելու է հետևյալ աշխատանքները՝
- Ուսումնասիրել Արցախի Հանրապետության՝ երեխաների իրավունքների պաշտպանության ոլորտում գործող ֆորմալ և ոչ ֆորմալ դերակատարների գործառույթները և աշխատանքի մեխանիզմները.
- Ուսումնասիրել ոլորտի դերակատարների համագործակցության շրջանակները և դրանց համակարգումը.
- Ուսումնասիրել դեպքերի հաղորդման և ուղղորդման մեխանիզմները, ինչպես նաև գործառույթների բաշխումը տարբեր դերակատարների միջև.
- Ուսումնասիրել ոլորտում գործող հաշվետվողականության մեխանիզմները և երեխաների (դեպքերի) վերաբերյալ տվյալների հավաքագրումը և վերլուծությունը.
- Ուսումնասիրել կյանքի դժվարին իրավիճակում հայտնված և հատուկ պաշտպանության կարիք ունեցող երեխաների հայտնաբերման, կարիքների գնահատման և անհատական աշխատանքները.
- Ուսումնասիրել Արցախի Հանրապետության երեխաների իրավունքների պաշտպանության ոլորտում առկա կանխարգելիչ և վերականգնողական ծառայությունների առկայությունը, դրանց աշխարհագրությունը, և հասանելիությունը հատկապես առավել խոցելի, ներառյալ՝ հաշմանդամություն ունեցող երեխաներին.
- Ուսումնասիրել Արցախի Հանրապետության երեխաների իրավունքների պաշտպանության ոլորտում աշխատող մասնագետների կարողությունները, նրանց կատարած աշխատանքների համապատասխանությունը պաշտոնի անձնագրերին, իրականացվող վերապատրաստումները.
- Մշակել վերը նշված ուսումնասիրությունների համար անհրաժեշտ մեթոդաբանություն.
- Ծրագրային թիմի ներկայացուցիչների հետ մասնակցել (անհրաժեշտության դեպքում) աշխատանքային քննարկումներին.
- Ներկայացնել իրականացված ուսումնասիրությունների վերաբերյալ մանրամասն հաշվետվություն:
Սոցիոլոգը պետք է ունենա՝
Ա) Սոցիոլոգի մասնագիտությամբ բարձրագույն կրթություն.
Բ) Սոցիոլոգի մասնագիտությամբ աշխատանքի առնվազն 5 տարվա փորձ.
Գ) Ուսումնասիրություններ և վերլուծություններ իրականացնելու փորձ և հմտություններ:
