Test
Պաշտպանի աշխատակազմի համագործակցությունը «ԼՂՀ փախստականների միություն» հասարակական կազմակերպության հետ իրականացվում է փախստական և ներքին տեղահանված անձանց հուզող հիմնախնդիրների վերհանման ու նրանց իրավունքների պաշտպանության ուղղությամբ: Այդ առումով, Պաշտպանի ջանքերն ուղղված են և՛ ներքին, և՛ միջազգային հարթակներում նշյալ անձանց հիմնախնդիրների բարձրացմանն ու իրավունքների պաշտպանությանը:
Պաշտպանի աշխատակազմը համագործակցում է «Քաղաքացիական նախաձեռնությունների կենտրոն» հասարակական կազմակերպության հետ հատկապես ազատազրկված անձանց իրավունքների պաշտպանության և մարդու իրավունքների վերաբերյալ իրազեկման աշխատանքների ուղղությամբ:
Պաշտպանի աշխատակազմի համագործակցությունը «Մայրություն» հասարակական կազմակերպության հետ առնչվում է հիմնականում մարդու իրավունքների վերաբերյալ իրազեկման աշխատանքներին:
Պաշտպանը ակտիվ համագործակցություն է իրականացնում ՀՀ Մարդու իրավունքների պաշտպանի հետ՝ համադրելով աշխատանքները միջազգային հարթակներում, կազմակերպելով պարբերական փոխայցելություններ, փորձի փոխանակում և այլն: Երկու Պաշտպանների համագործակցության դրսևորումներից է նաև քննարկման նպատակով դիմումների փոխանցումը:
Պաշտպանի աշխատակազմը համագործակցում է Վորլդ վիժն Հայաստան կազմակերպության հետ՝ համատեղ մեկնարկելով աղքատության փուլային հաղթահարման պիլոտային ծրագիր Արցախում, ինչպես նաև իրականացնելով երեխաների իրավունքների պաշտպանության իրավիճակի համապարփակ գնահատում:
«Իմ քայլը» հիմնադրամի հետ համագործակցության շրջանակներում Պաշտպանի աշխատակազմը համատեղ մեկնարկել է աղքատության փուլային հաղթահարման պիլոտային ծրագիր Արցախում, ինչպես նաև կազմակերպել է «Լույսի մոլորակ» ծնողի ու մանկան կրթական փառատոնը:
«Հույսի կամուրջ» հասարակական կազմակերպության հետ համագործակցությունը տեղի է ունենում հաշմանդամություն ունեցող անձանց իրավունքների պաշտպանության վիճակի հետազոտության ու իրազեկման աշխատանքների կազմակերպման տեսքով:
Հայ բարեգործական ընդհանուր միության և դրա Հայաստանի մասնաճյուղի հետ համագործակցությունն ընդգրկում է Պաշտպանի աշխատակազմի կարողությունների զարգացումը, մարդու իրավունքներին վերաբերող ծրագրերի իրականացումը, ինչպես նաև այս կայքի պատրաստումը՝ որպես իրազեկման աշխատանքներին մեծ աջակցություն:
Եվրոպական Օմբուդսմենի Ինստիտուտը մարդու իրավունքների պաշտպանությամբ զբաղվող անկախ մարմին է, որի շրջանակներում մի շարք երկրների օմբուդսմեններին, այդ թվում` ԱՀ Մարդու իրավունքների պաշտպանին, հնարավորություն է ընձեռվում կատարել փորձի և անհրաժեշտ գիտելիքների փոխանակում: 2009 թվականից Պաշտպանը Ինստիտուտի անդամ է, ինչը ենթադրում է կառույցի գլխավոր վեհաժողովին, վեհաժողովի ղեկավար մարմինների ընտրության մասնակցությամբ, ինչպես նաև պարբերական հանդիպումների ձևաչափով համագործակցություն:
Թուֆենկյան բարեգործական հիմնադրամի հետ համագործակցության շնորհիվ մշակվել և հրապարակվել է «Հայատյացությունն Ադրբեջանում. կազմակերպված ատելության խոսքը և թշնամությունն ընդդեմ հայերի» Պաշտպանի հատուկ զեկույցը, ինչպես նաև հիմնադրամի աջակցությամբ 2016 թվականից ի վեր Պաշտպանը կազմակերպում է մարդու իրավունքների պաշտպանության թեմայով շարադրությունների և լուսանկարների ու տեսանյութերի ամենամյա մրցույթներ դպրոցականների շրջանում:
ԱՄՆ Հայ իրավաբանների միության հետ Մարդու իրավունքների պաշտպանի աշխատակազմի համագործակցությունը ընդգրկում է փորձուսուցման ծրագրերի կազմակերպում ամերիկահայ ուսանողների համար, միության տարեկան համաժողովներին Պաշտպանի մասնակցությունը, պարբերական հանդիպումների և տարաբնույթ ծրագրերի համատեղ իրականացում: Հայ իրավաբանների միությունը նաև իր բաժին աջակցությունն է տրամադրել Արցախի պետական համալսարանում իրավաբանական կլինիկայի գործարկման հարցում: Բացի դրանից, Միության միջնորդությամբ Պաշտպանը համագործակցության հուշագիր է ստորագրել ԱՄՆ Հարավ-Արևմտյան համալսարանի իրավաբանական ֆակուլտետի հետ, որի հիման վրա արցախցի ուսանողներն ու հանրային ծառայողները հնարավորություն ունեն մարդու իրավունքների կրթություն ստանալ տվյալ համալսարանում:
Մարդու իրավունքների պաշտպանի աշխատակազմի հետ ՀՅԴ Եվրոպայի Հայ դատի գրասենյակի համագործակցությունը դրսևորվում է պաշտոնական փոխայցերի, հանդիպումների, Եվրապառլամենտի պատգամավորների պատվիրակությունների հետ հանդիպումների կազմակերպման, ինչպես նաև փորձուսուցման ծրագրերի կազմակերպման միջոցով: ՀՅԴ Եվրոպայի Հայ դատի գրասենյակը աջակցում է Պաշտպանի զեկույցների և այլ փաստաթղթերի տարածմանը, համապատասխան միջոցառումների կազմակերպմանը:
